U3F1ZWV6ZTE5Nzc2MDQ1NDk2X0FjdGl2YXRpb24yMjQwMzUzMTIyNDc=
recent
أخبار ساخنة

إعرف الفرق بين Oppo Reno 3 و Reno 3 Pro – هل فرق السعر يستاهل ؟!

محتويات العلب :-

بصراحة شكل علب سلسلة الـReno 2 كان Premium او فخم أكتر .. بس لما هتفتح علبة الـReno 3 Pro هتلاقي اول حاجة كرتونة صغيرة فيها الجراب الشفاف والضمان والكتالوج وهتلاقي ورقة متعلق فيها الدبوس اللي بيخرج درج الشرائح.
بعد كدا هتلاقي الموبايل .. وعليه ورقة مكتوب فيها ابرز المواصفات اللي بيجي بيها :-
  • الـPunch Hole بتاع السيلفي
  • الكاميرا الـTelephoto بتاعت الزوم
  • الكاميرا الخلفيه ال 64 ميجا بيكسل ويتعمل دمج بيكسلات لحد 108 ميجا بيكسل
  • الشاشة الأموليد
  • الشحن السريع الـ30 وات
بعد كده هنلاقي الشاحن الـVOOC الـ30 واط ووصلة الشحن .. والسماعات السلك التقليدية من اوبو .. بس كده دي محتويات علبة Reno 3 Pro.

بالنسبة بقى للـReno 3 العادي فا هو بيجي بنفس شكل العلبه .. هتفتح العلبه بتاعته هتلاقي نفس المحتويات تقريبًا مفيش فرق !
الكرتونة اللي فيها الجراب الشفاف والضمان والكتالوج ودبوس اللي بيخرج بيت الشرائح .. وبعدين هتلاقي الموبايل وعليه برده أبرز المواصفات اللي اوبو شايفاها انها نقط قوة في الموبايل ده.
وبعدين هتلاقي الشاحن الـVOOC بس قديم بيجي بقوة 20 وات .. بخلوا علينا علشان يقدروا يميزوا بين الموبايلين .. وهتلاقي برده وصلة الشحن والسماعات السلكية التقليديه.

التصميم :-

الموبايلين للأسف الشديد، جايين من ظهر بلاستيك بعد ما كان الظهر زجاج في سلسلة الـReno 2 القديمة .. وكمان في بروز للكاميرات كبير نسبيًا فهتضطر تركب الجراب الشفاف اللي جاي معاهم في العلبة علشان تغطي البروز ده.

بس اللي هتلاحظه جدًا ان الموبايلين وزنهم خفيف في الإيد علشان بلاستيك ومفيش موتور سلايدر .. وحجمهم مناسب جدا للاستخدام بايد واحدة .. والـ3 برو اقصر حاجة بسيطة اوي من الرينو 3 العادي.
وطبعًا مش هتكلم عن شكل التصميم .. لإن الـReno 3 العادي اللي باللون الأسود ده مش عاجبني على الإطلاق وكمان شكل رصة الكاميرات في الظهر سخيف جدا جدا .. انما الـ3 برو الأزرق مقبول نسبيًا.

الشاشة :-

الموبايلين جايين بشاشة 6.4 بوصة من نوع أموليد .. بس في فرق واضح هنا ان شاشة الـ3 برو شاشة كاملة بثقبين للسيلفي على الشمال .. والحافة السفلية للشاشة اقل بفرق واضح عن الـReno 3 العادي اللي جاي بالشاشة القديمة اللي بنوتش.

شوفنا الشاشات الأموليد ديه قبل كدا من اوبو في سلسلة الـReno 2 القديمة .. ومعجبنيش في الـReno 3 ان شكل النوتش قديم ومش مواكب تريند 2020.
ومعجبنيش في الرينو 3 برو وجود ثقبين للسيلفي خصوصًا ان العدسة الثانية للسيلفي ملهاش وظيفة حقيقية .. يعني مثلًا مش بتصوير Wide Angle زي الـRealme 6 Pro .. لأ هي للعزل ومش فارقه اوي.

الأداء :-

الـReno 3 العادي جاي بمعالج ميدياتيك Helio P90 .. والبرو جاي بمعالج ميدياتيك Helio P95 .. وحقيقي أداء المعالجين قريب جدًا جدًا من بعض .. مشفتش اي فرق جوهري بينهم.

ودايمًا اضعف حاجة في موبايلات اوبو هي المعالج .. برغم ان الأداء بيبقا مستقر والواجهة مستقره .. بس بتلاقي كل المنافسين بيقدموا معالجات اقوى.
وبشكل شخصي شايف معالج الـReno 2 القديم اللي هو كوالكوم سناب دراجون 730 افضل من الـP95 الموجود في Reno 3 Pro في الإستخدام.
هتكلم اكتر عن المعالجات ديه في الأداء في الألعاب في المراجعة النهائية بتاعت كل موبايل فيهم .. النهارده انا بس بوضحلك الفرق بينهم !

عوامل الأمان وعناصر اخرى :-

الموبايلين جايين ببصمة في الشاشة .. سريعة جدًا وعملية في الموبايلين مفيش فرق والـFace Unlock نفس الكلام برده.

الموبايلين فيهم ميزة زي الـAlways On Display اسمها هنا Display Clock Off .. بتعرضلك الساعة وايقونات اشعارات البرامج على الشاشة المطفية.

بس الـ3 برو كمان بتقدر تتحكم في شكل الساعة والأيقونات بتبقا ملونة .. انما الـOppo Reno 3 العادي مفيهوش اوبشن تعديل الـStyle .. مش عارف ليه كده يا اوبو !
الموبايلين مش بيدعموا NFC للأسف .. مع ان الـReno 2 القديم كان فيه NFC .. مش عارف احنا بنطلع لقدام ولا بنرجع لورا.
باقي الحاجات واحد في الموبايلين زي الصوت والشبكة والسوفت وير وكل الكلام ده هنتكلم عنه بالتفصيل في المراجعة النهائية لكل موبايل فيهم.

البطارية :-

الموبايلين بنفس البطارية المعهودة الـ4000 مللي أمبير اللي كنت اتمنى تبقا ازيد من كدا.

الـOppo Reno 3 العادي بيجي معاه شاحن 20 واط .. اما الـOppo Reno 3 Pro بيجي معاه شاحن 30 واط .. هجرب زمن الشحن بالظبط وهقولكم في المراجعة النهائية !

الكاميرات :-

الموبايلين بيجو بـ4 كاميرات في الظهر .. الأساسية في الـReno 3 Pro بدقة 64 ميجا بيكسل بفتحة عدسة F/1.8 .. والأساسية في الـReno 3 العادي 48 ميجا بيكسل بفتحة عدسة F/1.8 ومفيش مثبت بصري في ولا واحد فيهم.
باقي العدسات واحد في الإتنين .. كاميرا للزوم 13 ميجا بيكسل بفتحة عدسة F/2.4 بدون مثبت بصري مسؤولة عن الزوم 2X Optical ولحد 20X سوفت وير .. والعدسة التالته 8 ميجا بيكسل بفتحة عدسة F/2.4 للتصوير الواسع .. والاخيرة 2 ميجا بيكسل للتصوير ابيض واسود.

الكاميرا السيلفي في الـ3 برو مزدوجة 44 ميجا بيكسل بفتحة عدسة F/2.4 والتانية 2 ميجا بيكسل للعزل .. اما الـReno 3 العادي نفس العدسة السيلفي 44 ميجا بيكسل بنفس فتحة العدسة F/2.4 موجوده في نوتش الشاشة.
حقيقي انا بجرب الكاميرات بقالي فترة .. ومش حابب اتسرع في الحكم عليها .. بس انا مش شايف فرق جوهري بين الكاميرتين اصلا .. وخليني اجرب الكاميرات اكتر واقول لكم الحكم النهائي عليها في مقالة المراجعة النهائية.

الأسعار :-

الأسعار الرسمية لسه متمش الإعلان عنها ولكن متوقع إنها تكون كالتالي :-
  • الـReno 3 العادي النسخة 128 جيجا مع 8 جيجا رام .. بسعر حوالي 5300 جنية.
  • والـReno 3 Pro النسخة 256 جيجا مع 8 جيجا رام .. بسعر حوالي 7500 جنية.

والموبايلين ينفع تركب فيهم كارت ميموري وشريحتين اتصال مع بعض في نفس الوقت.

الملخص :-

النهارده انا وضحت لك تغيير سياسة اوبو من الجيل القديم في الـReno 2 للجيل الجديد Reno 3 في الشكل والخامات بشكل واضح .. ووضحت لك الفرق بين رينو 3 العادي والبرو !

وهنخلص تجربة الموبايلات الكاملة ونوافيكم بالتجربة النهائية .. متتسرعش واستنى المراجعة وأحكم بنفسك على الموبايلات قبل ما تشتري .. وشوف هما بيقدموا ايه والمنافسين بيقدموا ايه.
وعرفنا رأيك كده في كومنت في أخر المقالة ! .. هل انت شايف إن الإضافات اللي في Reno 3 Pro عن العادي .. اللي هي المساحة الأكبر وشكل الشاشة الأحدث والشحن الأسرع .. ومش هقولك الكاميرا الخلفيه ولا المعالج لإن مفيش فرق واضح .. هل الكلام ده يستاهل فرق سعر 2000 جنيه ؟ مع العلم ان الخامات البلاستيك واحد في الموبايلين !
الاسمبريد إلكترونيرسالة